ភ្នំពេញ: យុវជនទំនើង៣ នាក់ បានបើករថយន្តព្រូសមួយគ្រឿង ពាក់ស្លាកលេខខេមរភូមិន្ទ 2-3068 ក្នុងល្បឿនយ៉ាងលឿនទំនងជាស្រវឹងស្រា បានជ្រុលទៅបុកម៉ូតូវីវ៉ាមួយគ្រឿង ដែលមានគ្នា៣នាក់ដូចគ្នា កំពុងឈប់នៅភ្លើងស្តុប ហើយមិនដឹងថាខ្លួនឯងជាអ្នកខុស បែរជាចុះពីលើរថយន្ត នាំគ្នាវាយភាគីខាងម្ចាស់ម៉ូតូយ៉ាងចាស់ដៃ រួចឡើងបើករថយន្ត រត់គេចខ្លួនបាត់ដូចជាគ្មានរឿងអ្វីកើតឡើង។
ហេតុការណ៍ដែលបង្កឲ្យមានភ្ញាក់ផ្អើលនេះ បានកើតឡើងកាលពីវេលាម៉ោង៩ និង៣០ នាទី យប់ថ្ងៃទី ១៣ ខែកក្កដាឆ្នាំ ២០១៣ នៅចំណុចស្តុបផ្សារដើមគ ផ្លូវម៉ៅសេទុង កែងផ្លូវព្រះមុនីរ៉េត សង្កាត់បឹងសាឡាង ខណ្ឌទួលគោក ។
តាមសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញមានបុរស ៣ នាក់ ជិះម៉ូតូវីវ៉ាមួយគ្រឿង ពណ៌ខ្មៅ ក្នុងទិសដៅពីជើងទៅត្បូង បានមកឈប់នៅភ្លើងស្តុបផ្សារដើមគ។ ភ្លាមៗនោះ ស្រាប់តែមានជនទំនើងដែលអាងខ្លួនមានអំណាច មានគ្នា៣នាក់ ស្លៀកពាក់ស៊ីវិល បើករថយន្តព្រូស ពណ៌ទឹកប្រាក់ ពាក់ស្លាកលេខ ខេមរភូមិន្ទ 2-3068 មកបុកម៉ូតូពីក្រោយយ៉ាងពេញទំហឹង ហើយមិនដឹងថាខ្លួនឯងជាអ្នកខុស បែរជានាំគ្នាចុះគំរាមកំហែង និងបានវាយទៅលើម្ចាស់ម៉ូតូ បណ្តាលឲ្យរងរបួសយ៉ាងដំណំ ។
បន្ទាប់មក គេឃើញមាននគរបាលមូលដ្ឋាន ចុះទៅដល់កន្លែងកើតហេតុ ហើយក៏បានធ្វើការសាកសួរទៅភាគីខាងរងគ្រោះ និងភាគីខាងបង្កហេតុផងដែរ តែមិនអាចធ្វើអ្វីពួកអ្នកមានអំណាចទាំងនោះបានឡើយ។ ចំណែកឯភាគីខាងបង្កហេតុ បាននាំគ្នាឡើងជិះរថយន្តគេចខ្លួន ហាក់បីដូចគ្មានរឿងអ្វីកើតឡើង បន្ទាប់ពីបញ្ចេញអាកប្បកិរិយាច្រឡោមខាមនៅចំពោះមុខប៉ូលិស និងភាគីជនរងគ្រោះនាពេលនោះ។
ម្ចាស់ម៉ូតូ មិនចង់មានរឿងវែងឆ្ងាយ ក៏សម្រេចជិះម៉ូតូឌុបគ្នា ទាំងរងរបួស ទៅកាន់មន្ទីរពេទ្យភ្លាមៗ ដោយមិនបានដាក់ពាក្យបណ្តឹងអ្វីទេ ទំនងជាពួកគេគិតថា បើសិនដាក់ពាក្យបណ្តឹងទៅ ក៏ប្រហែលជាមិនអាចយកឈ្នះអ្នកដែលមានអំណាចទាំងអស់នោះឡើយ ៕
ប្រភព៖ CEN
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
