ភ្នំពេញ: បុរស៣នាក់ បានទទួលរងរបួសធ្ងន់និងស្រាល ក្រោយពីជិះម៉ូតូឌុបគ្នាទាំងស្រវឹង ទៅបុកខឿនរង្វង់មូល រួចជ្រុលទៅបុករថយន្តឡិចស៊ីស កាលពីវេលាម៉ោង ៩និង៤០នាទីយប់ ថ្ងៃទី១៥ ខែកក្កដា ឆ្នាំ២០១៣ តាមបណ្តោយមហាវិថីសហព័ន្ធរុស្ស៊ី ចំណុចរង្វង់មូលចោមចៅ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា អ្នករងរបួសទាំងបីនាក់ខាងលើ ជិះម៉ូតូម៉ាកហុងដា C125 ពណ៌ខ្មៅ ពាក់ស្លាកលេខ កំពង់ស្ពឺ 1A-9845 ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើត លុះមកដល់ចំណុចរង្វង់មូលចោមចៅ ម៉ូតូបានរេចង្កូតទៅបុកខឿនរង្វង់មូល រួចជ្រុលទៅបុករថយន្តឡិចស៊ីសRX300 ពណ៌ស អត់ចាំស្លាកលេខ បណ្តាលឱ្យដួលបោកនឹងថ្នល់ ចំណែករថយន្តបានបើកគេចបាត់។
ជនរងគ្រោះត្រូវបញ្ជូនទៅសង្គ្រោះនៅមន្ទីរពេទ្យព្រះកុសុមៈ ចំណែកម៉ូតូជនរងគ្រោះត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីរង់ចាំការដោះស្រាយ៕
ប្រភព៖ CEN
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
