ភ្នំពេញ: បុរសពីរនាក់ បានស្លាប់ភ្លាមៗនៅកន្លែងកើតហេតុ និងនារីម្នាក់ទៀត បានទទួលរងរបួសធ្ងន់ ក្រោយពីជួបគ្រោះថ្នាក់ចរាចរ រវាង ម៉ូតូពីរគ្រឿងបុកគ្នា នៅចំណុចកែងផ្លូវ១១៣ មុខហាងលក់ម៉ូតូហេងលី ស្ថិតក្នុងសង្កាត់បឹងកេងកងទី២ ខណ្ឌចំការមន កាលពីវេលាម៉ោង ១និង៥០នាទី រំលងអាធ្រាត្រ ឈានចូល ថ្ងៃទី១១ ខែកក្កដា ឆ្នាំ២០១៣។
សមត្ថកិច្ចបានឲ្យដឹងថា បុរសរងគ្រោះដែលស្លាប់ទាំងពីរនាក់នោះ ឈ្មោះ សុខ រដ្ឋា អាយុ២៤ឆ្នាំ ស្នាក់នៅផ្ទះលេខ៣៤ ផ្លូវ១៦២ ក្នុងសង្កាត់ទឹកល្អក់ទី៣ ខណ្ឌទួលគោក និងឈ្មោះ ឈុត តូ អាយុ២៨ឆ្នាំ រស់នៅភូមិតាសែន ឃុំតូទិព្វ ស្រុកជើងព្រៃ ខេត្តកំពង់ចាម។
សមត្ថកិច្ចបានឲ្យដឹងថា មុនពេលកើហេតុ គេឃើញម៉ូតូស៊ុយស៊ូគីនិច ពណ៌ស ពាក់ស្លាកលេខ ភ្នំពេញ 1BS-8485 ជិះគ្នា ២នាក់ ប្រុសម្នាក់ ស្រីម្នាក់ ធ្វើដំណើរតាមបណ្តោយផ្លូវព្រះសីហនុ ក្នុងទិសដៅពីលិចទៅកើត ខណៈមកដល់ចំណុចកែងផ្លូវ១១៣ មុខហាងលក់ម៉ូតូហេងលី ក៏បានជ្រុលចង្កូតទៅបុកម៉ូតូគុបជ្រុង ពណ៌ទឹកប៊ិច ពាក់ស្លាកលេខ ញ-0260 ភព1 បើកបរដោយបុរសម្នាក់ ធ្វើដំណើរពីត្បូងទៅជើង លើផ្លូវ១១៣ ចំពីមុខពេញទំហឹង បណ្តាលឲ្យបុរស២នាក់ បានស្លាប់ភ្លាមៗនៅនឹងកន្លែង និងនារីម្នាក់ បានទទួលរងរបួធ្ងន់។
ក្រោយពេលកើតហេតុ សមត្ថកិច្ចបានទាក់ទងទៅក្រុមគ្រួសារឱ្យមកទទួលសពយកទៅធ្វើបុណ្យតាមប្រពៃណី។
ចំណែកម៉ូតូទាំង ២គ្រឿង ត្រូវបានបញ្ជូនទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំការដោះស្រាយ៕
ប្រភព CEN
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
