នៅសល់តែចន្លោះពេល ៥ថ្ងៃទៀតប៉ុណ្ណោះ ប្រជាពលរដ្ឋដែលមានសិទ្ធិបោះឆ្នោតចំនួន៩.៦៧៥.៤៥៣នាក់ នឹងអញ្ជើញទៅកាន់ការិយាល័យបោះឆ្នោតចំនួន១៩.០០៩ការិយាល័យ នៅទូទាំងប្រទេស ដើម្បីធ្វើការបោះឆ្នោតផ្លាស់ប្តូររាជរដ្ឋាភិបាលចាស់ជ្រើសរើសយក រាជរដ្ឋាភិបាលថ្មីសម្រាប់អាណត្តិទី៥ នៅថ្ងៃទី២៨ ខែកក្កដា ឆ្នាំ២០១៣ ខាងមុខ។
ដោយឡែក នៅក្នុងសំណុំរឿងក្តីរបស់ជនជាប់ចោទឈ្មោះ ឈូក បណ្ឌិត អតីតអភិបាលក្រុងបាវិតដ៏ក្តៅគគុកពាក់ព័ន្ធនឹងការប្រើអាវុធ បាញ់ប្រហារទៅលើកម្មការិនីបម្រើការងារនៅរោងចក្រផលិតស្បែកជើង កៅវ៉េ «KAOWAY» ឋិតនៅក្រុងបាវិត ខេត្តស្វាយរៀង ចំនួន៣នាក់ បណ្តាលឲ្យរងរបួសធ្ងន់សឹងបាត់បង់ជីវិតនោះ មានរយៈពេលជិត០១ខែហើយ ដែលតុលាការសាលាដំបូងខេត្តស្វាយរៀងចេញដីកាបង្គាប់ឲ្យចាប់ខ្លួន ជនជាប់ចោទរូបនេះយកមកផ្តន្ទាទោសដាក់ពន្ធនាគារតាមច្បាប់ «ដីកាបង្គាប់ឲ្យចាប់ខ្លួនចុះថ្ងៃទី២៥ ខែមិថុនា ឆ្នាំ២០១៣» ប៉ុន្តែ សមត្ថកិច្ចនគរបាលយុត្តិធម៌ «ទាំងប៉ូលិស ទាំងប៉េអឹម» មិនទាន់តាមចាប់ខ្លួនឈ្មោះឈូក បណ្ឌិត បាននៅឡើយ ហើយក៏មានន័យថា ជនជាប់ចោទឈ្មោះ ឈូក បណ្ឌិត កំពុងមានសេរីភាពយ៉ាងពេញបរិបូរណ៌ទោះបីតុលាការបានសម្រេចផ្តន្ទាទោស ដាក់ពន្ធនាគារចំនួន១៨ខែ គិតពីថ្ងៃចាប់ខ្លួនបានក៏ដោយ។
ប្រិយមិត្តអ្នកអានគេហទំព័រសារព័ត៌មានដើមត្នោត ដែលស្រឡាញ់យុត្តិធម៌ ធ្លាប់បានប្រកាសផ្តល់រង្វាន់ជាប្រាក់ចំនួន ៧.០០០.០០០ «ប្រាំពីរលាន» រៀល ដល់ប្រជាពលរដ្ឋនិងសមត្ថកិច្ចដែលបានផ្តល់ព័ត៌មានពីទីកន្លែង លាក់ខ្លួន និងឈានទៅរកការចាប់ខ្លួនឈ្មោះ ឈូក បណ្ឌិត បានតាមដីកាបង្គាប់ឲ្យចាប់ខ្លួនរបស់តុលាការ ដើម្បីទុកជាការលើកទឹកចិត្ត «សូមចូលអានគេហទំព័រសារព័ត៌មានដើមត្នោតចុះផ្សាយថ្ងៃទី២១ ខែកក្កដា ឆ្នាំ២០១៣បន្ថែម»។
ឥឡូវនេះ ប្រិយមិត្តអ្នកអានគេហទំព័រសារព័ត៌មានដើមត្នោត ដែលស្រឡាញយុត្តិធម៌ទាំងនោះបានប្រកាសផ្តល់ប្រាក់រង្វាន់បន្ថែមគិត ចាប់ពីថ្ងៃប្រកាសចុះផ្សាយនេះតទៅរហូតដល់ថ្ងៃទី២៧ ខែកក្កដា ឆ្នាំ២០១៣ វេលាម៉ោង ១៩ ល្ងាច «ឬម៉ោង ០៧ ល្ងាច មុនថ្ងៃបោះឆ្នោត» នូវទឹកប្រាក់ចំនួន ៧០.០០០ «ប្រាំពីរម៉ឺន» រៀល ក្នុងមួយថ្ងៃ ទៅលើប្រាក់រង្វាន់ចំនួន ៧ លានរៀល ក្នុងករណីមានការចាប់ខ្លួនឈ្មោះ ឈូក បណ្ឌិត បាន។ មានន័យថា ប្រាក់រង្វាន់ក្នុងការចាប់ខ្លួនឈ្មោះ ឈូក បណ្ឌិត មានចំនួនសរុប ៧.៤២០.០០០ «ប្រាំពីរលានបួនសែន និងពីរម៉ឺន» រៀល ។
ប្រិយមិត្តអ្នកអានគេហទំព័រសារព័ត៌មានដើមត្នោត ដែលស្រឡាញ់យុត្តិធម៌បានបញ្ជាក់បន្ថែមទុកជាការប្រកាសជូនដំណឹង ចុងក្រោយដែរថា ប្រាក់រង្វាន់ទាំងអស់ដែលបានប្រកាសនាពេលនេះ «ទាំងប្រាក់រង្វាន់ប្រកាសពីលើកមុន និងប្រាក់រង្វាន់បន្ថែម ដែលប្រកាសលើកក្រោយនេះ» នឹងត្រូវបញ្ចប់ជាស្តាពរក្នុងករណីចាប់ខ្លួនឈ្មោះ ឈូក បណ្ឌិត មិនបានសម្រេចរហូតដល់ថ្ងៃទី ២៧ ខែកក្កដា ឆ្នាំ២០១៣ វេលាម៉ោង ១៩ «ឬម៉ោង ០៧» ល្ងាច ដោយមានន័យថា រាជរដ្ឋាភិបាលកម្ពុជាចាស់ គ្មានលទ្ធភាពនឹងតាមចាប់ខ្លួនជនជាប់ចោទឈ្មោះ ឈូក បណ្ឌិត បាន គឺមានតែទុកឱកាសឲ្យរាជរដ្ឋាភិបាលកម្ពុជាអាណត្តិថ្មី ដែលកើតចេញពីការបោះឆ្នោតជាតិឆ្នាំ២០១៣ ខាងមុខនេះជាអ្នកមានសមត្ថកិច្ចចាត់ការជំនួសវិញ។
ចំពោះកម្មវិធីប្រកាសរង្វាន់លើកទឹកចិត្តថ្មីបើមានតទៅទៀតគេហទំព័រ សារព័ត៌មានដើមត្នោត នឹងធ្វើការប្រកាសជូនដំណឹងនៅពេលក្រោយ៕ប្រភពមកពី ដើមត្នោត DTN7
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
