ក្រុងប៉េកាំង : ប្រសិនបើលោកអ្នកបានធ្វើដំណើរកម្សាន្តឆ្លងកាត់ខេត្តហ្វូជៀននៃប្រទេសចិននោះសូមកុំភ្លេចឆៀងចូលទៅភូមិមួយឈ្មោះដាកាវ (Dacuo)ឲ្យសោះ។ ជាពិសេសចូលទៅទស្សនាក្រុមតន្ត្រីអ្នកស្រុកមានឈ្មោះថា «តន្ត្រីរន្ទះបាញ់ឬLightningfan»។ ក្រុមតន្ត្រីនេះបានបង្កើតឆាកតន្ត្រីដែលមានចរន្តអគ្គិសនីឆ្លងកាត់ដោយឧបករណ៍ម្យ៉ាងហៅថាតេសឡា(Tesla)ដោយវាអាចមានកម្លាំងថាមពលចរន្តអគ្គិសនីដល់ទៅមួយលានវ៉ុលឯណោះ។ តាមរយៈឆាកតន្ត្រីនេះពួកគេក៏អាចប្រគំតន្ត្រីបានដែរ។
លោកវ៉ាងសេងសៀងបុរសវ័យ៣១ឆ្នាំគឺជាអ្នកបានរកឃើញនិងបង្កើតក្រុមតន្ត្រីផ្លេកបន្ទោរនេះឡើង។ លោកបានប្រើមេសរសៃបន្ទះលោហៈចម្លងអគ្គិសនី ចំនួន១០សរសៃប្រទាក់ក្រឡាគ្នាដើម្បីបង្កើតឲ្យបានជាផ្ទាំងសំណាញ់ផ្កាភ្លើងនានាបាន។
លោកវ៉ាងដែលជាស្ថាបនិកក្រុមតន្ត្រីនេះបានថ្លែងថា៖ «ពេលខ្ញុំនៅក្មេងគ្រួសារខ្ញុំមានរបរបើកកន្លែងជួសជុលគ្រឿងអគ្គិសនី។ ខ្ញុំស្រឡាញ់មុខវិជ្ជាផ្នែកអគ្គិសនីនេះតាំងពីក្មេងវ័យមក»។
តែនៅឆ្នាំ២០០១ពេលបុរសរូបនេះចូលរៀនមហាវិទ្យាល័យផ្នែកវិស្វកម្មមេកានិកនិងអគ្គិសនីនៃសាកលវិទ្យាល័យកសិកម្មនិងរុក្ខាប្រមាញ់ហ្វូជៀននោះគាត់ក៏បានរកឃើញនូវលោហៈធាតុចម្លងចរន្តអគ្គិសនីដ៏គួរឲ្យចាប់អារម្មណ៍ជាងគេ។
ឆ្នាំ២០០៧លោកបានបង្កើតបន្ទះលោហៈចម្លងចរន្តអគ្គិសនីមានប្រវែងដល់ទៅ១,២ម៉ែត្រសម្រាប់ដាក់នៅផ្ទះលោកដោយបានលាលែងពីការងារវិស្វករអគ្គិសនីនៅក្រុមហ៊ុនមួយផងដែរ។ លុះក្រោយមកលោក និងមិត្តភក្តិក៏មានគំនិតបង្កើតវាឲ្យក្លាយឆាកតន្ត្រីរន្ទះបាញ់សម្រាប់ប្រគំឲ្យអ្នកភូមិទស្សនាកម្សាន្ត។
ក្រុមតន្ត្រីរន្ទះបាញ់នេះក៏មានសម្លៀកបំពាក់ការពារការឆក់ចរន្តអគ្គិសនីដែរជាមួយនឹងឆាកតន្ត្រីផ្កាភ្លើងមានកម្ពស់៤,២ម៉ែត្រនោះ។ ក្រុមតន្ត្រីករនីមួយៗអាចលេងឧបករណ៍ភ្លេងពួកគេដោយមិនមានការគ្រោះថ្នាក់អ្វីឡើយ។ ពេលពួកគេប្រគំតន្ត្រីគេឃើញមានផ្កាភ្លើងលេចចេញឡើងមានរូបរាងផ្សេងៗគ្នាទៅតាមសំឡេងឧបករណ៍តន្ត្រីតែម្ដង៕ PR
__________________
ប្រភពពី៖ ខ្មែរប៉ុស្តិ៍
ប្រភពពី៖ ខ្មែរប៉ុស្តិ៍
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
