ភ្នំពេញៈ លោក សម រង្ស៊ី ប្រធានគណបក្សសង្គ្រោះជាតិ បានមកដល់ប្រទេសកម្ពុជានៅព្រឹកថ្ងៃសុក្រនេះ ហើយរូបលោកនឹងទៅថ្លែងសារនយោបាយដោយផ្ទាល់ជាលើកដំបូងនៅទីលានប្រជាធិបតេយ្យ នៅចំពោះមុខសកម្មជនគណបក្សសង្គ្រោះជាតិ រាប់ម៉ឺននាក់ដែលកំពុងទន្ទឹងរង់ចាំរូបលោក។
លោក សម រង្ស៊ី ដែលបានរស់នៅនិរទេសជាង ៤ ឆ្នាំ ដើម្បីគេចពីការផ្តន្ទាទោស ១១ ឆ្នាំ ត្រូវបានប្រទានការលើកលែងទោសដោយព្រះមហាក្សត្រ នរោត្តម សីហមុនី កាលពីថ្ងៃសុក្រសប្តាហ៍មុនដើម្បីត្រួសត្រាយផ្លូវឲ្យលោក អាចចូលរួមការបោះឆ្នោតដើម្បីប្រកួតប្រជែងជាមួយបុរសជើងខ្លាំង លោកនាយករដ្ឋមន្ត្រីហ៊ុន សែន នៃគណបក្សប្រជាជនកម្ពុជា ដែលបានគ្រប់គ្រងប្រទេស ២៨ ឆ្នាំមកហើយ។
ការមកដល់របស់មេដឹកនាំគណបក្សប្រឆាំងរូបនេះ ត្រូវបានទទួលស្វាគមន៍ពីសកម្មជន រាប់ម៉ឺននាក់ រួមទាំងលោក កឹម សុខា អនុប្រធានគណបក្សសង្គ្រោះជាតិ និងសមាជិកជាន់ខ្ពស់គណបក្សជាច្រើននាក់ទៀត នៅឯព្រលានយន្តហោះអន្តរជាតិភ្នំពេញ។
កំលាំងអាជ្ញាធរមានសមត្ថកិច្ចជាច្រើននាក់ ក៏ត្រូវបានដាក់ពង្រាយតាមដងផ្លូវ ដើម្បីរៀបចំសន្តិសុខ សណ្តាប់ធ្នាប់ និងការការពារកុំឲ្យមានភាពចលាចល ដើម្បីការពារនូវសុវត្ថិភាពរបស់លោកសម រង្ស៊ីផងដែរ។ ទោះជាយ៉ាងណាក្តី ដោយសារមានមនុស្សបានមកទទួលលោក សម រង្ស៊ី លើសពីការរំពឹងទុក បានបណ្តាលឲ្យមានការកកស្ទះចរាចរណ៍យ៉ាងខ្លាំងផងដែរ។
នៅលើគេហទំព័ររបស់គណបក្សសង្គ្រោះជាតិ ដែលបានផ្សាយផ្ទាល់ពីសកម្មភាពការវិលត្រលប់មកវិញរបស់លោក សម រង្ស៊ី មានអ្នកចូលទស្សនាប្រមាណជាង ១ លាននាក់ ខណៈដែលនៅលើបណ្តាញសង្គមហ្វេកប៊ុកវិញ ក៏មានការបង្ហោះរូបភាពនៃការវិលត្រលប់របស់លោក សម រង្ស៊ី យ៉ាងផុសផុលផងដែរ។
ខណៈ ពេលដែលលោក សម រង្ស៊ី ដើរចេញពីព្រលានយន្តហោះជាមួយនឹងការកាន់ដៃលោក កឹម សុខា យ៉ាងជាប់ លោក សម រង្ស៊ី បានស្រែក មុនលោកឡើងឡានជាមួយលោក កឹម សុខាថា «ខ្ញុំត្រលប់មក ដើម្បីសង្គ្រោះពួកយើង!»។ នៅតាមដងផ្លូវ សកម្មជនជាច្រើនម្នាក់បានស្រែកឡើងព្រមៗគ្នាថា «ដូរ មិនដូរ!» «ជយោ! លោកប្រធាន សម រង្ស៊ី និងលោក កឹម សុខា!»។
ក្បួនដង្ហែរលោក សម រង្ស៊ី បានចាកចេញពីព្រលានយន្តហោះអន្តរជាតិភា្លមៗឆ្ពោះទៅកាន់ទីលានប្រជាធិបតេយ្យ ដោយមានការហែហមដោយអ្នកគាំទ្ររាប់ម៉ឺននាក់ រួមទាំងអ្នកសារព័ត៌មានជាតិ និងអន្តរជាតិ និង ប្រជាពលរដ្ឋបានលើកដៃស្វាគមន៍មេដឹកនាំគណបក្សប្រឆាំងរូបនេះតាមដងផ្លូវ។ តាមការគ្រោងទុក លោក សម រង្ស៊ី នឹងធ្វើការថ្លែងសារនយោបាយ នៅទីនោះ ដើម្បីផ្តល់ទំនុកចិត្តដល់សកម្មជនរបស់ខ្លួនបន្ថែមទៀត ក្នុងការបន្តឃោសនារកសម្លេងឆ្នោត។
យ៉ាងណាក៏ដោយ ការមកដល់របស់លោក សម រង្ស៊ី មិនទាន់ស្ថិតក្នុងឋានៈជាបេក្ខជនតាមផ្លូវច្បាប់ឡើយ ដោយឈ្មោះរបស់លោក ត្រូវបានគេលុបចេញពីបញ្ជីឈ្មោះអ្នកបោះឆ្នោត ប៉ុន្តែការរំពឹងទុកមុនពេលលោកមកដល់ ព្រមទាំងកេរ្តិ៍ឈ្មោះរបស់លោកក្នុងគណបក្សប្រឆាំងនឹងធ្វើឲ្យវា អាច ដែលការឃោសនានេះ នឹងឈានដល់កម្រិតថ្មីមួយទៀតនាប៉ុន្មានថ្ងៃខាងមុខនេះ។
លោក សម រង្ស៊ី នៅសល់ពេល ៨ ថ្ងៃទៀត មុនពេលការឃោសនារកសម្លេងឆ្នោតត្រូវបានបញ្ចប់។
ប្រភពពី ភ្នំពេញ ប៉ុស្តិ៍
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
