ភ្នំពេញ: តារាចម្រៀងចាស់វស្សា នៅក្នុងទ្រនំផលិតកម្មហង្សមាស កញ្ញា ពេជ្រ សោភា បានសរសេរប្រកាស និងបង្ហោះនៅលើបណ្តាញទំនាក់ទំនងសង្គមហ្វេសប៊ុក កាលពីពេលថ្មីៗនេះថា នាងត្រៀមខ្លួនរួចជាស្រេច ក្នុងការបោះឆ្នោតនៅពេលខាងមុខ ហើយនាងក៏បានឆ្លើយតបទៅកាន់អ្នកដែលនិយាយឲ្យនាងថា មិនហ៊ានចេញមុខធ្វើការគាំទ្រគណបក្សនយោបាយណាមួយ ឲ្យប្រាកដនោះ។
ការសរសេររៀបរាប់របស់ ពេជ្រ សោភា បានបង្ហោះនៅលើ Account Facebook របស់នាង បានរៀបរាប់យ៉ាងដូច្នេះថា “នាងខ្ញុំ ពេជ្រ សោភា សូមមិនចូល ឬប្រកាន់បក្សណាមួយនោះទេ តែខ្ញុំនឹងទៅបោះឆ្នោត ហើយមនុស្សគ្រប់រូប មានសិទ្ធិជ្រើសរើសនូវអ្នកដឹកនាំ ដែលខ្លួនស្រឡាញ់ និងទុកចិត្ត តាមរយៈសន្លឹកឆ្នោតរបស់ខ្លួន ។ អីចឹងកុំភ្លេចទៅបោះឆ្នោតទាំងអស់គ្នាណា។ នាងខ្ញុំក៏មានបក្សនយោបាយដែលខ្ញុំស្រឡាញ់គាំទ្រដែរ”។
តារាចម្រៀងដែលពូកែរាំ ពេជ្រ សោភា បានបន្តទៀតថា “ក្នុងនាមជាតារាមួយរូប នាងខ្ញុំសូមមិនបង្ហាញគោលជំហរ ឈរនៅខាងណានោះទេ ព្រោះសិល្បៈជាផ្នែកមួយដែលឆ្លុះបញ្ចាំងពីប្រទេស ហើយសិល្បៈក៏ជាមនុស្សរបស់មហាជន មិនថាយើងស្រឡាញ់ ឬប្រកាន់បក្សនយោបាយមួយណា ឬយ៉ាងណានោះទេ យើងទាំងអស់គ្នា សុទ្ធតែចង់ឲ្យប្រទេសរីកចម្រើន និងសុខសន្តិភាពដូចគ្នា ដូចនេះយើងជាខ្មែរដូចគ្នា ត្រូវចេះស្រឡាញ់ រួបរួមសាមគ្គីគ្នា មិនត្រូវឈ្លោះប្រកែកគ្នានោះទេ ត្រូវរស់នៅដោយសន្តិភាពជាមួយគ្នា ខ្មែរស្រឡាញ់ខ្មែរ” ។
នៅថ្ងៃទី១៤ខែកក្កដាឆ្នាំ២០១៣ នាងបានបន្តបង្ហោះបន្ថែមថា “ជាការពិត នាងខ្ញុំមិនចង់និយាយ ឬបញ្ចេញទស្សនៈអ្វីទាក់ ទងនឹងបញ្ហានយោបាយ ជាពិសេសទាក់ទងនឹងការបោះឆ្នោតនោះទេ ។ ប៉ុន្តែនាងខ្ញុំសម្រចចិត្តនិយាយនេះ ដើម្បីបញ្ចេញយោបល់ផ្ទាល់ខ្លួន និងឆ្លើយតបនឹងបុគ្គលមួយចំនួន ដែលនិយាយដាក់នាងខ្ញុំថា ខ្ញុំកំសាក ខ្ញុំខ្លាច មិនហ៊ានបញ្ចេញ បើសិនជាខ្ញុំខ្លាំង ម្ដេចមិនបង្ហាញបក្ស ដែលនាងខ្ញុំគាំទ្រមក ។ នាងខ្ញុំគិតថា គ្មានហេតុផលអី ដែលត្រូវនិយាយមកនោះទេ ព្រោះនេះជាសិទ្ធិបុគ្គល ហើយសំខាន់ឲ្យតែចិត្តយើងច្បាស់ថា ស្រឡាញ់មួយណា ហើយក៏មិនចង់បានឈ្មោះថា វ៉ៃអែបស៊ីអបអីដែរ។
នាងខ្ញុំសុខចិត្តធ្វើជាមនុស្សអន់ ធ្វើជាមនុស្សទន់ខ្សោយ ដើម្បីសន្សំកម្លាំងធ្វើការចិញ្ចឹមឪពុកម្ដាយខ្ញុំវិញល្អជាង ព្រោះគាត់ជាអ្នកផ្ដល់កំណើតឲ្យខ្ញុំ។ ហើយមនុស្សគ្រប់រូប មានសិទ្ធិរក្សាការសម្ងាត់លើការបោះឆ្នោត ហេតុនេះទើបការបោះឆ្នោត ត្រូវធ្វើក្នុងបន្ទប់សម្ងាត់ ដើម្បីរក្សាការសម្ងាត់ អព្យាក្រឹត្យភាព និងគ្មានការបង្ខិតបង្ខំ បើអីចឹងអ្នកអាចទៅសាកសួរខាង គ.ជ.ប. បើសិន ជាអ្នកគិតថា ត្រូវតែបញ្ចេញបក្សនយោបាយដែលខ្លួនស្រឡាញ់នោះ ។ សុំទោស នាងខ្ញុំមានសិទ្ធិ រក្សាសិទ្ធិសេរីភាពខ្លួនឯង ដោយមិនប៉ះពាល់លើសិទ្ធិអ្នកដទៃ ហេតុនេះសូមអ្នកយល់” ។
ចំពោះពាក្យពេចន៍ខាងលើរបស់ កញ្ញា ពេជ្រ សោភា ត្រូវបានទស្សនិកជន ក៏ដូចជាអ្នកនិយមលេងតាមបណ្ដាញសង្គមហ្វេសប៊ុក ធ្វើការសន្និដ្ឋានបានថា នាងចង់ឲ្យប្រជាពលរដ្ឋខ្មែរ ចេះស្រឡាញ់គ្នា សាមគ្គីគ្នា កុំយកខ្មែរជាសត្រូវ និងយល់ពីតួនាទី របស់ខ្លួនច្បាស់លាស់ មិនជ្រុលនិយម ដូចតារាចម្រៀង តារាសម្ដែង និងតារាកំប្លែងមួយចំនួននោះឡើយ៕
ប្រភពៈ CEN
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
