សាលា ដំបូងនៃសាលាក្ដីខ្មែរក្រហម នៅថ្ងៃទី១៧ កក្កដា បន្តស្ដាប់សក្ខីកម្មរបស់សាក្សីឈ្មោះ ស្ទីវ ហេដឌ័រ (Steve Heder) ជុំវិញរឿងរ៉ាវបក្សកុម្មុយនិស្តកម្ពុជា តាមសៀវភៅដែលលោកសរសេរ។ នៅក្នុងសវនាការថ្ងៃដដែលនេះ ជនជាប់ចោទ នួន ជា បានប្រកាសថា គាត់ឈប់ឆ្លើយតបដល់ភាគីណាទៀតហើយ។ការប្រកាសរបស់ជនជាប់ចោទ នួន ជា នេះ គឺធ្វើឡើងដោយផ្ទាល់មាត់ក្នុងសវនាការសាលាដំបូងនៅរសៀលថ្ងៃទី១៧ ខែកក្កដា ឆ្នាំ២០១៣ ដោយបញ្ជាក់ថា សាលាដំបូងមានភាពលម្អៀង ដែលធ្វើឱ្យគាត់អស់ជំនឿ៖ «ខ្ញុំសូមជូនដំណឹងថា ខ្ញុំមិនឆ្លើយតបទៅនឹងសំណួររបស់ព្រះរាជអាជ្ញា និងភាគីនានា នៅក្នុងតុលាការ ដែលមិនយុត្តិធម៌នេះទេ។ ក្នុងគ្រានេះ ការពិត យុត្តិធម៌នឹងមានប្រយោជន៍ ត្រូវបានបំផ្លាញដោយតុលាការ»។
ជនជាប់ចោទ នួន ជា បញ្ជាក់ទៀតថា មូលហេតុដែលនាំឱ្យសម្រេចចិត្តបែបនេះ ក៏ព្រោះតែលោកសង្កេតឃើញថា ការប្រព្រឹត្តរបស់តុលាការចំពោះជនជាប់ចោទ និងមេធាវីការពារក្ដី បានវិវឌ្ឍន៍ពីអាក្រក់កាន់តែអាក្រក់ទៅទៀត ដោយភាពលម្អៀង ហើយធ្វើឱ្យលោកអស់ជំនឿលើតុលាការដូចជនជាប់ចោទ ខៀវ សំផន ដែរ៖ «ជាក់ស្ដែង ដូចជាពេលថ្មីនេះ មេធាវីរបស់ខ្ញុំត្រូវបានកាត់ផ្ដាច់មិនឱ្យសួរសំណួរជាសារធាតុ ដើម្បីដោះបន្ទុកមកលើរូបខ្ញុំនោះទេ។ នេះជាភាពអយុត្តិធម៌មួយដែលរារាំងមិនឱ្យមេធាវីរបស់ខ្ញុំបំពេញ តួនាទីការពារខ្ញុំដោយពេញលេញ។ នេះជារឿងក្ដីនៃអាយុជីវិតរបស់ខ្ញុំ។ មិនមែនជាការធ្វើលំៗ ឱ្យតែឆាប់រហ័ស ដើម្បីដាក់ទោសខ្ញុំនោះទេ»។
នៅក្នុងសវនាការសាលាដំបូង មេធាវីការពារក្ដីជនជាប់ចោទ នួន ជា តែងត្រូវបានសហព្រះរាជអាជ្ញាជំទាស់ជារឿយៗ ហើយត្រូវប្រធានអង្គជំនុំជម្រះបញ្ឈប់ លែងឱ្យសួរដេញដោល ដោយលើកហេតុផលថា មេធាវីការពារសួរសំណួរច្រំដែល សួរចាកប្រធាន ឬអង្គហេតុ និងប្រើប្រាស់ពេលវេលាខ្ជះខ្ជាយ។ ជនជាប់ចោទ នួន ជា កត់សម្គាល់ថា សាលាដំបូងប្រព្រឹត្តចំពោះភាគីដើមចោទ និងចុងចោទមិនស្មើគ្នា។
ភាគីសហព្រះរាជអាជ្ញាជម្រាបជូនអង្គជំនុំជម្រះថា ករណីជនជាប់ចោទ នួន ជា ដូចគ្នានឹងករណីជនជាប់ចោទ ខៀវ សំផន ដែរ ដែលប្រកាន់ជំហរមិនឆ្លើយតប ហើយភាគីខ្លួនស្នើសុំឱ្យអង្គជំនុំជម្រះប្រកាសជាលាយលក្ខណ៍អក្សរ ចំពោះជនជាប់ចោទ អំពីអង្គហេតុ និងផលវិបាកនានា។ បញ្ហានេះបានកើតឡើងបន្ទាប់ពីមានការជជែកអំពីការទទួលយកសក្ខីកម្ម ដោយមិនកោះហៅសាក្សី។
ដោយឡែក ភាគីមេធាវីនាំមុខដើមបណ្ដឹងរដ្ឋប្បវេណីថ្លែងទៅកាន់អង្គជំនុំ ជម្រះថា ភាគីខ្លួនមិនភ្ញាក់ផ្អើលចំពោះការប្រកាន់ជំហរមិនឆ្លើយតបរបស់ជន ជាប់ចោទទេ៖ «ទោះបីជាខ្ញុំស្រឡាំងកាំងចំពោះការលើកឡើងរបស់ នួន ជា នេះ ក៏ខ្ញុំមិនភ្ញាក់ផ្អើលដែរ ព្រោះនេះជាឥរិយាបថរបស់ជនជាប់ចោទទាំងពីរ។ ក៏ប៉ុន្តែ ខ្ញុំសោកស្ដាយណាស់។ ការអត្ថាធិប្បាយរបស់ខ្ញុំ គឺដូចគ្នាអ្វីដែលខ្ញុំបានលើកឡើងពាក់ព័ន្ធនឹងលោក ខៀវ សំផន អ៊ីចឹង គ្រាន់តែខ្ញុំចង់លើកឡើងមួយចំណុច ខ្ញុំសង្កេតឃើញថា អស់រយៈពេលប៉ុន្មាននេះមក បន្តិចម្ដងៗ មេធាវីការពារក្ដី និងជនជាប់ចោទហ្នឹង គិតថាខ្លួនជាជនរងគ្រោះ»។
អង្គជំនុំជម្រះសាលាដំបូងនឹងបន្តសវនាការរបស់ខ្លួនទៀត នៅថ្ងៃព្រហស្បតិ៍ ទី១៨ ខែកក្កដា ឆ្នាំ២០១៣៕
ប្រភពពី RFA
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
