ភ្នំពេញៈ ដោយសារការស្រឡាញ់សិល្បៈចម្រៀងតាំងពីតូចក្រូចឆ្មារបានញ៉ាំងឲ្យតារាចម្រៀង សុខ ពិសី ដែលដើមឡើយមានទីលំនៅ នៅឯក្រុងតាខ្មៅជម្នះគ្រប់ឧបសគ្គធ្វើដំណើរចុះឡើងមកភ្នំពេញដើម្បីស្វែងរកឱកាសហក់ចូលវិស័យសិល្បៈចម្រៀង។ ក្រោយពេលបានសម្រេចបំណង និងទទួលបានភាពល្បាញល្បីកាន់តែខ្លាំងនោះ ស្រាប់នៅក្នុងឆ្នាំ២០០៨ តារារូបនេះទទួលរងវិប្បដិសារីស្ទើរងើបមុខមិនរួច ដោយសារតែម្តាយរបស់នាងរួមជាមួយនឹងបងប្អូនជាច្រើននាក់បានស្លាប់ក្នុងពេលតែមួយនៅក្នុងគ្រោះថ្នាក់ចរាចរណ៍មួយនៅលើផ្លូវជាតិលេខ៤ ដែលរូបនាងជាអ្នកបើកបរ។ តើការប្រឹងប្រែងរស់របស់តារាចម្រៀងរូបនេះទៅជាយ៉ាងណា?
នាង សុខ ពិសី មានកំណើតកើតជានៅថ្ងៃទី១៩ ខែធ្នូ ឆ្នាំ១៩៩០ នៅក្រុងតាខ្មៅ ខេត្តកណ្ដាល។ តារាស្រីសាច់សខ្ចីរូបនេះមានឪពុកឈ្មោះ សុខ ហេង អាយុ៤៦ឆ្នាំជាមន្ត្រីក្នុងជួរទាហានរីឯម្ដាយឈ្មោះ រស់ សុគន្ធារី (បានទទួលមរណភាពក្នុងហេតុការណ៍ក្រឡាប់រថយន្តកាលពីខែមេសា ឆ្នាំ២០០៨)។សុខ ពិសីមានបងប្អូនបីនាក់ (ប្រុស២ ស្រី១) ហើយនាងជាកូនទីពីរ។ នាងមានកម្ពស់១៦៧សង់ទីម៉ែត្រ និងមានទម្ងន់ជាមធ្យម ៤៧គីឡូក្រាម។
សុខ ពិសី បានបញ្ចប់ការសិក្សាថ្នាក់បាក់ឌុបក្នុងឆ្នាំ២០០៨ ប៉ុន្មានខែក្រោយពេលដែលនាងជួបគ្រោះថ្នាក់ក្រឡាប់រថយន្តហើយនាងត្រូវចូលរួមប្រឡងទាំងឈឺតែម្តង។ គ្រោះល្អនាងបានជាប់ការប្រឡងមធ្យមសិក្សាទុតិយភូមិ ហើយក៏បានឱកាសចូលបន្តការសិក្សានៅវិទ្យាស្ថានភាសាបរទេស(IFL)។
ដោយសារតែចង់ក្លាយជាតារាចម្រៀងនៅអាយុ១៧ឆ្នាំ យុវតីនាង សុខ ពិសី ក៏បានចូលខ្លួនមកហាត់រៀនផ្នែកសិល្បៈចម្រៀងនៅក្នុងក្លិបមួយកន្លែង។ ដោយមើលឃើញថា នាងមានទេពកោសល្យ គ្រូបង្ហាត់ក៏បានណែនាំឲ្យនាងបានសុំធ្វើតេស្តច្រៀងនៅផលិតកម្ម KH ជាលទ្ធផលនាងក៏បានជាប់ការធ្វើតេស្តសំឡេងនោះ ហើយនាងក៏បានក្លាយជាតារាចម្រៀងពេញសិទ្ធិរបស់KH តែម្តងនៅក្នុងឆ្នាំ២០០៥។
លុះនៅឆ្នាំ២០០៧ តារាចម្រៀងដែលមានឈ្មោះល្បីរួចជាស្រេចនៅ KH ក៏បានប្តូរទ្រនំទៅកាន់ផលិតកម្មNice Star ទាំងមានបណ្តឹងប្រទាំងប្រទើសពីលោក គឹម ហេង ចាងហ្វាងផលិតកម្ម KH។
នៅឆ្នាំ២០០៨ ជាឆ្នាំដ៏អាក្រក់បំផុតនៅក្នុងជីវិតតារាចម្រៀង សុខ ពិសី ដោយសារតែរថយន្ត Lexus ផ្ទុកមនុស្សណែនរបស់នាង ដែលបើកបរដោយនាងផ្ទាល់ បានក្រឡាប់ជាច្រើនត្រឡប់នៅតាមបណ្តោយផ្លូវជាតិលេខ៤ ឆ្ពោះទៅខេត្តព្រះសីហនុ ជាទីដែលនាងត្រូវឡើងច្រៀង។ ក្នុងនោះមនុស្ស៤នាក់ បានស្លាប់ ដោយរួមទាំងម្តាយរបស់នាងផង។ សុខ ពិសី ក៏បានក្លាយជានារីកំព្រាម្តាយ តាំងពីនាងមានអាយុ២០ឆ្នាំ។
ទាំងមិននឹកស្មានក្រោយរងគ្រោះថ្នាក់ក្រឡាប់រថយន្តគេគ្រប់គ្នាបានគិតថា សុខ ពិសី នឹងបញ្ចប់អាជីពសិល្បៈរបស់នាង តែអ្វីៗ បែរជាខុសការស្មាន ខណៈដែលស្ងាត់ៗ សុខ ពិសី ក៏វិលមកកាន់វិថីចម្រៀងវិញ ក្នុងខែមេសា ឆ្នាំ២០០៩ ជាតារាចម្រៀងក្នុងផលិតកម្មកូរ៉េមួយ ប៉ុន្តែបានតែមួយដង្ហើមចង្រិតផលិតកម្មនោះក៏បិទទ្វារ។ដោយសារតែតារាចម្រៀងរូបនេះនៅតែមានទឹកដមសំនៀងល្អ សុខ ពិសី ក៏បានក្លាយជាតារាចម្រៀងរបស់ផលិតកម្មសាន់ដេ រហូតមកដល់សព្វថ្ងៃនេះហើយកំពុងក្រសោបបានភាពល្បីល្បាញយ៉ាងខ្លាំងផងដែរ៕
តារាចម្រៀងនាង សុខ ពិសី ដែលបានស្លាប់ម្តាយកាលពីវ័យ២០ឆ្នាំ។ រូប សេត គឹមសឿន
ប្រភពៈ Postkhmer
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
