តារាចម្រៀង ខេមរៈ សេរីមន្ត។ រូបថត សេត គឹមសឿន
ព្រះសីហនុៈ បន្ទាប់ពីតុលាការខេត្តព្រះសីហនុបើកសវនាការជាលើកដំបូងកាលពីព្រឹកថ្ងៃទី១៥ ខែកក្កដា ម្សិលមិញ លើបណ្តឹងរបស់ជនរងគ្រោះដូចជាតារាចម្រៀង ខេមរៈ សេរីមន្ត តារាកំប្លែងនាយកុយ យាយណាង និងជនរងគ្រោះមួយចំនួនទៀត ពាក់ព័ន្ធនឹងការបង្កគ្រោះថ្នាក់ចរាចរណ៍យ៉ាងធ្ងន់ធ្ងរ និងបណ្តាលឲ្យមនុស្សជាច្រើននាក់ស្លាប់ភ្លាមៗដែលបង្កឡើងដោយរថយន្តកុងតឺន័ររបស់ក្រុមហ៊ុន SK(សុខ កន)នោះនាយ កុយ បានបញ្ជាក់ឲ្យដឹងក្រោយសវនាការថា សាលក្រមនឹងប្រកាសនៅថ្ងៃព្រហស្បតិ៍ ទី១៨ ខែកក្កដា ខាងមុខ ដោយលោកបញ្ជាក់ថា លោកសង្ឃឹមឈ្នះ៩៩ភាគរយ តែរឿងសំណងយ៉ាងណានោះ លោកមិនទាន់ដឹងនៅឡើយ។
គួររំឭកថា កាលពីវេលាម៉ោង៨ និង៣០នាទីយប់ថ្ងៃទី៧ ខែមីនា ឆ្នាំ២០១៣កន្លងទៅតារាចម្រៀង ខេមរៈ សេរីមន្ត រួមជាមួយនឹងក្រុមការងារ៨នាក់(រួមមានក្មេងម្នាក់)បានធ្វើដំណើរតាមរថយន្តTundra ពណ៌សពីភ្នំពេញទៅខេត្តព្រះសីហនុ ដើម្បីច្រៀងនៅក្នុងការប្រគំតន្ត្រីមួយហើយក៏ជួបគ្រោះថ្នាក់ចរាចរណ៍ដ៏រន្ធត់មួយនៅលើផ្លូវជាតិលេខ៤ ត្រង់ចំណុចគីឡូម៉ែត្រ២១១-២១២ ស្ថិតក្នុងភូមិពូធឿង ឃុំបិតត្រាំង ព្រៃនប់ ព្រះសីហនុ។
គ្រោះថ្នាក់ដ៏រន្ធត់នេះបង្កឡើងដោយរថយន្តកុងតឺន័រក្រុមហ៊ុន SK បុកពេញទំហឹងទៅលើរថយន្តTundra របស់ខេមរៈ សេរីមន្ត បណ្តាលឲ្យក្រុមការងាររបស់ពួកគេស្លាប់៤នាក់ភ្លាមៗ ក្នុងនោះមានកូនប្រុសតារាកំប្លែងល្បីឈ្មោះនាយ កុយ ម្នាក់ និងកូនប្រុសតារាចម្រៀងអាយ៉ៃយាយ ណាង ម្នាក់ផងដែរ។
នៅក្នុងសន្និសីទនៅឯសមាគមសិល្បករខ្មែរកាលពីថ្ងៃទី៥ មេសា សេរីមន្ត និងក្រុមជនរងគ្រោះបានអំពាវនាវដល់សម្តេចតេជោហ៊ុន សែន ឲ្យលោកជួយធ្វើអន្តរាគមន៍ចំពោះក្រុមហ៊ុន SK ដែលជាអ្នកបង្កហេតុនិងដែលគ្មានការទទួលខុសត្រូវចំពោះក្រុមគ្រួសារជនរងគ្រោះ។ នៅទីបញ្ចប់តារាចម្រៀង ខេមរៈ សេរីមន្ត បានបញ្ជាក់ថា អង្គសវនាការនឹងចាប់ផ្តើមនៅថ្ងៃទី១៥ ខែកក្កដា។
ក្រោយបើកសវនាការជាលើកដំបូងពេញមួយព្រឹកកាលពីថ្ងៃទី១៥ កក្កដា ម្សិលមិញនេះ តារាចម្រៀង ខេមរៈ សេរីមន្ត មិនអាចទាក់ទងបានទេតែតារាកំប្លែងជើងចាស់នាយ កុយ បានឲ្យដឹងថា នៅក្នុងសវនាការនោះមានការចូលរួមពីជនរងគ្រោះទាំងអស់លើកលែងតែខេមរៈ សេរីមន្ត ប៉ុណ្ណោះ ហើយក៏មានការចូលរួមពីមន្ត្រីប៉ូលិស មេធាវីក្រុមហ៊ុន SK មេធាវីកាំមីនកូ និងភាគីពាក់ព័ន្ធមួយចំនួនទៀតផងដែរ។
នាយ កុយថា៖«អស់រយៈពេលជិត៥ខែហើយ ទើបតែនៅពេលនេះ តុលាការព្រះសីហនុលើកយកមកជំនុំជម្រះ ដំបូងគេទម្លាក់កំហុសថា យើងមានភ្លើងឡាហ្ស៊ែរ តែឥឡូវនេះអត់ទេ»។
ក្រោយពេលការសាកសួររបស់តុលាការជុំវិញរឿងនេះ តារាកំប្លែងជើងចាស់នាយ កុយបានសម្តែងនូវក្តីសង្ឃឹមចំពោះការទាមទាររកយុត្តិធម៌ចំពោះកូនខ្លួន និងជនរងគ្រោះដទៃទៀតដោយលោកបានបញ្ជាក់ថា សម្រាប់រឿងនេះ លោកសង្ឃឹមឈ្នះ៩៩ភាគរយ តែរឿងការសងសំណងយ៉ាងណានោះលោកមិនហ៊ានអះអាងនោះទេ។
នាយ កុយ បាននិយាយថា៖«នៅក្នុងសវនាការនោះ តុលាការបានសួរនាំពីគ្រោះថ្នាក់នេះ ហើយបានសួរអំពីការបាត់បង់របស់យើងមានអ្វីខ្លះរបស់ទ្រព្យ អារម្មណ៍ ក៏ដូចជាខាងសតិផ្លូវចិត្ត និងពេលវេលារបស់យើង។ តែខ្ញុំមិនសង្ឃឹមថា អ្វីៗបានតាមការទាមទារ និងបណ្តឹងរបស់យើងទាំងស្រុង១០០ភាគរយទេ បានតែ៥០ភាគរយក៏បានដែរ ហើយយើងក៏មិនមើលឃើញតែលុយដែរ ព្រោះកូនយើងបានស្លាប់ហើយតែអ្វីដែលសំខាន់ គឺការចូលខ្លួនមកទទួលខុសត្រូវរបស់ក្រុមហ៊ុន SK (សុខ កន) នោះ»។
ដោយឡែកចៅក្រមក្នុងសំណុំរឿងនេះមិនអាចទាក់ទងបំភ្លឺបានទេពីម្សិលមិញ ដោយសារមានអ្នកលើកទូរស័ព្ទហើយប្រាប់ថា ច្រឡំលេខ។
រីឯលោក ខេមរៈ ភារុណ អ្នកនាំពាក្យសេរីមន្ត បាននិយាយថា លោកមិនបានដឹងពីការសម្រេច ឬក៏ដំណើរជម្រះរបស់តុលាការយ៉ាងណាទេ ព្រោះលោកនិងខេមរៈ សេរីមន្ត នៅភ្នំពេញ មិនបានចូលរួមសវនាការទេ ហើយមិនទាន់ទទួលបានព័ត៌មានពីមេធាវីនោះដែរ។
តែយ៉ាងណាចំពោះលទ្ធផលនៃអង្គសវនាការកាលពីម្សិលមិញនៅខេត្តព្រះសីហនុនាយ កុយ បញ្ជាក់ថា៖«សំណុំរឿងនេះ នឹងត្រូវប្រកាសនៅថ្ងៃព្រហស្បតិ៍ទី១៨ កក្កដា ខាងមុខនេះ»៕
ប្រភព Postkhmer
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
