កំពង់ឆ្នាំង ៖ កុមារីសិស្សសាលាម្នាក់បានស្លាប់នៅកន្លែងកើតហេតុ និងម្នាក់ទៀតបានរងរបួសជាទម្ងន់ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយដែលបានកើតឡើង កាលពីវេលាម៉ោង៤ និង៣០នាទី ល្ងាចថ្ងៃទី ១៨ខែកក្កដា តាមបណ្តោយផ្លូវជាតិលេខ៥ ចំណុចចន្លោះគីឡូម៉ែត្រ១០០និង១០១ ទុលមុខផ្សារពង្រស្ថិតក្នុងភូមិថ្មី ឃុំពង្រ ស្រុកបរិបូណ៏ ក្នុងដែលកុមារីទាំង២នាក់ជិះកង់ឆ្លងផុតថ្នល់ជាតិ ទៅហើយ។
នគរបាលមូលដ្ឋានបាននិយាយអោយដឹងថា កុមារីរងគ្រោះឈ្មោះឈឹម ភីណា អាយុ ១៤ឆ្នាំ បានស្លាប់ភ្លាមៗនៅកន្លែងកើតហេតុ និងម្នាក់ទៀតឈ្មោះ រិន ស្រីម៉ី អាយុ ១៤ឆ្នាំដូចគ្នារងរបួសធ្ងន់ ពួកគេទាំង២នាក់រស់នៅភូមិឧទម្ពរ ឃុំពង្រ ស្រុករលាប្អៀរ។
មុនពេលកើតហេតុ កុមារីទាំងពីរនាក់បានជិះកង់ឌុបគ្នា ចេញពីសាលារៀន ហើយពេលមកដល់មុខផ្សារពង្រ បានជិះកង់ឆ្លងថ្នល់ជាតិពីជើងទៅត្បូង ផុតទៅហើយ ក៏ស្រាប់តែពេលនោះមានរថយន្តម៉ាកកាមរីបាឡែនពណ៍ស ពាក់ស្លាកលេខ ភ្នំពេញ 2S.0950 មួយគ្រឿងបើកបរក្នុងល្បឿនយ៉ាងលឿនដោយជនពុំស្គាល់មុខក្នុងដំណើរពីលិចទៅកើត លុះមកដល់ចំណុចកើតហេតុក៏បានជែងវ៉ារថយន្តមួយគ្រឿងទៀត ទើបជ្រុលទៅបុកកុមារីទាំងពីរនាក់ប៉ើង និងអូសជាង៥០ម៉ែត្រ រួចជ្រុលទៅបុកតូបលក់ឥវ៉ាន់មួយ និងបានជ្រុលបុកចូលផ្ទះអ្នកប្រកបមុខរបរបោះពុម្ពមួយទៀត។ ទើបរថយន្តជាន់ហ្វ្រាំងជាប់ ហើយបានបើកគេចទៅមុខជាង៧គីឡូម៉ែត្រ ក៏បានបត់រថយន្ត បើកឡើងដល់ចង្កេះភ្នំ ធម្មវ័ន ស្ថិតក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ទើបអ្នកបើកបរឈប់ទុករថយន្តចោលនៅទីនោះ ហើយចុះរត់គេចខ្លួនបាត់តែម្តង។
កុមារីរងរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យខេត្តជាបន្ទាន់ ចំណែកសពជនរងគ្រោះត្រូវបានប្រជាពលរដ្ឋជួយយកគ្របកន្ទេលពីលើ នៅកៀនចិញ្ចើមថ្នល់រង់ចាំក្រុមគ្រួសារមកយកទៅធ្វើបុណ្យតាមប្រពៃណី។ ក្នុងពេលនោះដែរក៏មានភ្លៀងធ្លាក់យ៉ាងខ្លាំង ធ្វើអោយអ្នកឈរមើលហេតុការណ៍នេះបានរត់រកកន្លែងជ្រកគ្រប់គ្នា។ ចំណែកសពជនរងគ្រោះបានទុកចោលនៅហាលភ្លៀង គួរអាណិតអាសូរ។ ក្រោយមកក្រុមគ្រួសារបានមកដល់និងបានដឹកសពកុមាររងគ្រោះតាមម៉ូតូទាំងភ្លៀងដូចចាក់ទឹក យ៉ាងសង្វេគនិងរន្ធត់ក្រៃលែង។
រថយន្តបង្កត្រូវបានសមត្ថកិច្ចនាំមករក្សាទុក នៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តទាំងមេឃកំពុងធ្លាក់ភ្លៀង ដើម្បីចាត់ការដោះស្រាយតាមនីតិវិធី នៅក្នុងរថយន្តនោះ គេពិនិត្យឃើញមានដឹកស្រាទំពាំងបាយជូរមានតម្លៃប្រមាណជាង១០កេះ និងស្បែកជើងមានតម្លៃច្រកការ៉ុងមួយចំនួនទៀត៕
ឈៀង ថារិទ្ធ
ប្រភព កម្ពុជាថ្មី
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
