ភ្នំពេញ: រថយន្តសណ្តោងកុងតឺន័ររបស់ក្រុមហ៊ុនតិចស្រ៊ុន បុកម៉ូតូនិងកិនដាច់ជាពីរកំណាត់បណ្តាលឲ្យអ្នកបើកម៉ូតូម្នាក់ស្លាប់នៅនឹងកន្លែង និងអ្នករួមដំណើររងរបួសស្រាល។
ហេតុការណ៍គ្រោះថ្នាក់ចរាចរនេះកើតឡើងកាលពីវេលាម៉ោង ១១ និង៥០នាទីអធ្រាត្រ ថ្ងៃទី ១៤ កក្កដា ២០១៣ នៅចំណុចផ្លូវវេងស្រេង កែងផ្លូវណតប្រ៊ីត ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ។
សមត្ថកិច្ចបានឲ្យដឹងថា ជនរងគ្រោះដែលស្លាប់មានឈ្មោះ ឈុំ វិជ្ជា អាយុ២៤ឆ្នាំ ជាជាងកាត់ដេរ ស្នាក់នៅក្បែងកន្លែងកើតហេតុ មានស្រុកកំណើតនៅភូមិព្រែចង្ក្រាន ឃុំព្រែកព្នៅ ខេត្តព្រៃវែង ចំណែកអ្នករួមដំណើរមិនស្គាល់ឈ្មោះ។
សមត្ថកិច្ចបន្តថា រថយន្តបង្កFUSO សណ្តោងកុងតឺន័រ ពាក់ស្លាកលេខភ្នំពេញ3B-2219 បើកបរដោយបុរសម្នាក់ និងព្រូម្នាក់ក្រោយកើតហេតុរត់គេចខ្លួនបាត់ ។ ចំណែកម៉ូតូរបស់ជនរងគ្រោះម៉ាកគុបសេ៧០ ពណ៌ទឹកប៊ិច ពាក់ស្លាកលេខសៀមរាប1I-9538 ជិះគ្នា២នាក់។
សាក្សីបានឲ្យដឹងថា មុនកើតហេតុរថយន្តសណ្តោងកុងតឺន័របើកតាមផ្លូវវេងស្រេង ក្នុងទិសដៅពីត្បូងទៅជើង ចំណែកម៉ូតូបើកតាម ផ្លូវណតប្រ៊ីត ក្នុងទិសដៅពីកើតទៅលិចខណៈមកដល់ចំណុចកើតហេតុ ម៉ូតូបើកឆ្លងផ្លូវ ក៏ត្រូវរថយន្តកុងតឺន័រ បុកចំពីមុខពេញទំហឹង បណ្តាលឲ្យអ្នកបើកម៉ូតូស្លាប់ភ្លាមៗនៅកន្លែងកើតហេតុ និងអ្នករួមដំណើររងរបួសស្រាល រីឯម៉ូតូត្រូវរថយន្តកុងតឺន័រ បុកអូសជាង១០ម៉ែត្រ ដាច់ម៉ូតូជាពីរកំណាត់។
រថយន្ត និងម៉ូតូត្រូវបានសមត្ថកិច្ចយកទៅរក្សាទុកនៅការិយាល័យចរាចរផ្លូវគោករងចាំដោះស្រាយគ្នាជាក្រោយតាមផ្លូវច្បាប់។
សពជនរងគ្រោះត្រូវបានបងប្អូនដឹកតាមរថយន្តយកទៅធ្វើបុណ្យនៅឯស្រុកកំណើត៕
ប្រភព៖ CEN
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
