កំពង់ឆ្នាំង ៖ យុវជនជាកម្មករលាងរថយន្តម្នាក់ត្រូវបានខ្សែភ្លើងឆក់ស្លាប់ខណៈពេលដែលមានភ្លៀងធ្លាក់គេបានទាញទ្វារបន្ទប់បិទកៀបចំខ្សែភ្លើង។ ហេតុការណ៍នេះបានកើតឡើងនៅវេលាម៉ោង៣និង៣០នាទីល្ងាចនៅក្នុងភូមិចំការឃ្លៃ ឃុំស្វាយជ្រុំ
ស្រុករលាប្អៀរ។
សមត្ថកិច្ចនគរបាលមូលដ្ឋានបានឲ្យដឹងថា យុវជនរងគ្រោះឈ្មោះ ថាប់ ពិសី អាយុ១៨ឆ្នាំមានទីលំនៅក្នុងភូមិថ្លុកជ្រៅ ឃុំអញ្ចាញរូង ស្រុកបរិបូណ៌ ជាកម្មករលាងរថយន្តឲ្យឈ្មោះ សុខ សំបូរ អាយុ៤៥ឆ្នាំ នៅភូមិចំការឃ្លៃ។ មុនពេលកើតហេតុមានខ្យល់និងភ្លៀងយ៉ាងខ្លាំង ពេលនោះឈ្មោះ ថាប់ ពិសី បានដើរទៅទាញទ្វារដែកបន្ទប់បិទកុំឲ្យទឹកភ្លៀងសាចចូលពេលទាញទ្វារបិទបានកៀបនិងខ្សែភ្លើងបណ្ដាលឲ្យភ្លើងឆក់គេស្លាប់តែម្តងនៅឈរឆ្ងក់ផ្អែកជាប់នឹងទ្វារ។
ក្រោយពេលកើតហេតុមិត្តភក្ដិជាកម្មករដូចគ្នា៣ទៅ៤នាក់បានទាញគេចេញហើយលើដាក់លើគ្រែ បន្ទាប់មកបានដឹងតាមម៉ូតូឌុបមកកាន់មណ្ឌលសុខភាពឃុំស្វាយជ្រំដោយមានសភាពធ្ងន់ធ្ងរម្ចាស់ផ្ទះបានជួលរថយន្តដឹកបញ្ជូនមកសង្គ្រោះក្នុងមន្ទីរពេទ្យបង្អែកខេត្ត ប៉ុន្តែពេលមកដល់មន្ទីរពេទ្យខេត្តគ្រូពេទ្យបានប្រាប់ថាជនរងគ្រោះបានស្លាប់បាត់ទៅហើយទំនងជាស្លាប់តាំងពីក្រោយពេលកើតហេតុភ្លាមៗមកម្ល៉េះ។
ប្រភពពីក្រុមគ្រួសារជនរងគ្រោះបានឲ្យដឹងទៀតថា ម្ចាស់ផ្ទះជាថៅកែលាងម៉ូតូបានសម្របសម្រួលជាមួយគ្រួសារជនរងគ្រោះជួយឧបត្ថម្ភប្រាក់ចំនួន ១.៥០០.០០០រៀល ដើម្បីយកទៅធ្វើបុណ្យតាមប្រពៃណីដោយឲ្យក្រុមគ្រួសារជនរងគ្រោះធ្វើកិច្ចសន្យាមិនប្តឹងផ្តល់។ ប្រភពព័ត៌មានពីអ្នកស្រុកឲ្យដឹងថា ក្រុមគ្រួសារយុវជនរងគ្រោះមានជីវភាពក្រីក្រខ្លាំងណាស់គ្មានជម្រើសអ្វីក្រៅពីទទួលប្រាក់ខាងលើមកធ្វើបុណ្យទានឲ្យកូននោះទេ ទោះបីប្តឹងផ្តល់ក៏គ្មានលុយសម្រាប់រត់ការដែរ៕
ប្រភព កម្ពុជាថ្មី
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
