ភ្នំពេញ ៖ កម្មការិនីកាត់ដេរម្នាក់ត្រូវបានគេប្រទះឃើញសពអណ្ដែតទឹកជ្រោះបាត់ស្នេហ៍ បន្ទាប់ពីបាត់ខ្លួន រយះពេល២ថ្ងៃរួចមក តាមការអះអាងរបស់មិត្តភក្តិនារីរងគ្រោះថានាងអាចលោតទឹកសំលាប់ខ្លួន ដោយសារមានវិបត្តិអ្វីមួយ ប៉ុន្តែមិនមានអ្នកណាដឹងដោយសារវិបត្តិអ្វីនោះទេ។ហេតុការណ៍ប្រទះឃើញសពមានការភ្ញាក់ផ្អើលនៅវេលាម៉ោង៨ព្រឹកថ្ងៃទី១៩ខែកក្កដាឆ្នាំ២០១៣នៅក្នុងទឹកជ្រោះបាត់ស្នេហ៍ ក្នុងក្រុមទី១៤ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ។
សពនារីរងគ្រោះត្រូវបានគេស្គាល់ឈ្មោះ យុន សុខជា អាយុ២៥ឆ្នាំ ស្នាក់នៅផ្ទះជួល ក្រុមទី ១៤ សង្កាត់ហេតុខាងលើ មានស្រុកកំណើតភូមិត្រពាំងលាជ ឃុំព្រះពន្លាស្រុកកំពង់រោរិ៍ ខេត្តស្វាយរៀង ជាកម្មការិនីកាត់ដេរនៅរោងចក្រ សប្លេនឌីដ ឆេន (SPLENID CHANCE) ហៅរោងចក្រដំបូលក្រហម មានទីតាំងនៅសង្កាត់ទួលសង្កែ ខណ្ឌឫស្សីកែវ។បើតាមឈ្មោះ ឈៀន វុត្ថា អាយុ២៣ឆ្នាំ ជាមិត្តរួមការងារបានឱ្យដឹងថា មុនថ្ងៃបាត់ខ្លួន គឺនៅល្ងាចថ្ងៃទី២៧ខែកក្កដាឆ្នាំ២០១៣ នារីរងគ្រោះ បានមកលេងនិងហូបបាយនៅបន្ទប់ជួលរបស់នាង យប់ឡើងបានដេកជាមួយនាង ដល់ព្រឹកថ្ងៃទី១៨ នារីរងគ្រោះបានភ្ញាក់ពីដំណេកមុនមកអង្គុយនៅមាត់ជ្រោះបាត់ស្នេហ៍មុន ហើយក្រោយមក នាងក៏មកអង្គុយជាមួយគ្នាដែរ ដោយមានម្ចាស់ផ្ទះម្នាក់ទៀតជជែកគ្នាលេងជាធម្មតា។
ប្រភពបន្តថា ក្រោយមកនាងដល់ម៉ោងធ្វើការក៏បបួលស្ត្រីរងគ្រោះទៅ ធ្វើការដែរតែស្ត្រីរងគ្រោះប្រាប់ថាឱ្យនាងទៅមុន ក្រោយមកស្រាប់បាត់ខ្លួននាងរហូតទើបមានគេប្រទះឃើញសពអណ្ដែតទឹកជ្រោះបាត់ស្នេហ៍នេះតែម្តង។តាមរយះ បុរសឈ្មោះ ទុំគង្គាត្រូវជាបងជីដូនមួយ បានឱ្យដឹងថា នារីរងគ្រោះជាកូនកំព្រារស់នៅជាមួយជីដូនចាស់ជរាគ្មានទីពឹង បានមកធ្វើកម្មករកាត់ដេររយះពេល៦ឆ្នាំមកហើយ មិនដែលមានរឿងអ្វីនោះទេ។បើតាមការសន្និដ្ឋានរបស់សមត្ថកិច្ចជំហានដំបូង នារីរងគ្រោះគឺអាចលោតទឹកសម្លាប់ខ្លួន ដោយសារមានវិបត្តិអ្វីមួយ ប៉ុន្តែគេមិនដឹងមានវិបត្តិអ្វីនោះឡើយ។ក្រោយមកពីប៉ូលិសធ្វើការពិនិត្យរួចរាល់បានប្រគល់សពស្ត្រីរងគ្រោះឱ្យទៅបងប្អូនធ្វើបុណ្យទៅតាមប្រពៃណីនៅវត្តទួល៕
ឌី រៀ
ប្រភព៖ កម្ពុជាថ្មី
សំគាល់ៈ Read Khmer មិនមែនជាម្ចាស់ដើម នៃពត៌មាននេះទេ ។ ដូច្នេះយើងមិនទទួលខុសត្រូវលើពត៌មាននេះទេ ។ បើសិនជាមានបញ្ហាមិនប្រក្រតី ចុចត្រង់នេះ ដើម្បីទំនាក់ទំនងយើងខ្ញុំ ។
សូមជួយផ្តល់មតិ និង ចែករំលែក !
